باختصار ..
انا زوجة وأم لطفلين زي القمر ماشاء الله ربنا يحفظهم.. ومش ناقصني اي حاجة فحياتي.. اللهم لك الحمد يعني انا افضل من ناس كتير اوي اوي اوي ناقصهم حاجات كتير وعندهم ابتلاءات كتير بتنغص عليهم حياتهم ، واهم نعمتين ربنا رازقني بيهم هم (الصحـة والستر) اللهم أدمها نعمة واحفظها من الزوال.
بس منكرش إن في حاجات بسيطة نقصاني.. ودي حاجات ثانوية جداً ممكن تكون موجودة عند حد تاني بس هتلاقو ربنا واخد منهم حاجات تانية أساسية وأهم موجودة عندي انا، يعني من الآخر مفيش حد عندو كل حاجة، ومفيش حد كامل
انا العشر سنين الي فاتو من حياتي كنت بعيدة جداً عن ربنا، شغلني عنه حاجات كتير منها الجواز والبيت والحمل والولادة والتربية والغربة.. للأسف الشديد حاجات كتير شغلتني عنه وحتى الصلاة كنت مقصرة فيها جدا جداً.. وفي ذنوب كتير عملتها مش هقولها من باب (عدم المجاهرة بالذنب) كل ما افتكرها بتنغص علية حياتي.. وبتعكر يومي وبتقل مزاجي، ودة بيأثر بشكل سلبي علية نفسياً وعلى بيتي وولادي وكمان على علاقتي بزوجي.
قابلت ناس كتير، واتعاملت اكتر بحكم اني بشتغل.. واتعلمت حاجات كتير اوي بس طبعا زي منتو عارفني محدش بيتعلم بدون ما يخسر او بدون ما يتقرص.
وللأسف رغم اننا بناخد بالنا من أخطاءنا بعد كدة، إلا إن الدروس الي احنا اتعلمناها دي بتسيب معانا ذكريات سيئة جدا بتبأة بمثابة نقط سودا كل ما بنفتكرها بنحزن من جوانا ونسأل نفسنا ليه عملنا كدة وازاي !! او نبأة مستغربين من تصرف الإنسان الي غدر بينا ونفضل نسأل نفسنا بردو إحنا غلطنا فإيه، عملنا ايه غلط نتحاسب عليه كدة ، او ليه يتغدر بينا ونهون أوي كدة ؟؟
الفترة الأخيرة دي قربت جداً من ربنا ولله الحمد، ودي بجد النعمة الوحيدة الي كانت نقصاني.. انا يابنات مبعرفش ادعي ربنا.. يعني مش كل حاجة بطلبها منه.. بس دايما لما كنت بدعيه وانا بصلي (ايام ما كنت بعيدة عنه) افضل اقول يارب انا مش عيزة حاجة غير انك تقربني منك.. انا عيزاك انت.. اللهم اجعل الصلاة قرة عيني،
كنت بتكسف ادعي ربنا واطلب منه وانا عندي كل حاجة.
بس كنت بغبط ناس كتير جدا عالنعمة دي (قوة الإيمان) رغم ان كان بيبأة ناقصهم حاجات كتير اوي
المهم لما قربت من ربنا اوي كدة، كان الابتلاء الوحيد الي فحياتي حالياً هو ال10 سنين الي فحياتي الي فاتت .. كنت بتمنى انسى بأي شكل.. لأني كنت كل ما افتكر حاجات معينة، او اشخاص معينين فالماضي.. بحس ان التفكير دة بيبعدني عن ربنا وبيرجعني 100 خطوة لورا .. فكان همي الوحيد اني انسى بجد. ووصلت لمرحلة رهيبة من اليأس، وهي اني اتمنيت من البي بجد ودعيت ربنا إني أفقد الذاكرة.. وطبعا دة تفكير من الشيطان
كنت بمر بفترة حزن واكتئاب عميييقة جداً وبدون الدخول في تفاصيل كتير لأني مش هخلص.. هختصرها ليكم بإني كنت مانعة الأكل تماماً، عايشة عالقهوة والمية بس.. وحسة بمرارة كدة من جوايا، وكأني مغيبة دايما سرحانة وحزينة وعيني مدمعة.. بحاول انفرد بنفسي بأي شكل عشان اعيط وأفرغ الي جوايا.. لأني مش من النوع الي بحكي او بشكي لحد، وبحب الإنعزال ، ومبحبش حد يشوف دمعتي.. وكمان في أمور شخصية مبحبش حد يعرفها عني..
ومكنتش بلائي احسن من ربنا رفيق اني اسجدله وافضل ابكي
والله يابنات .. لأن احيانا الواحد بيبأة عندو حاجات مينفعش تتحكي لحد
كنت اول ماسجد عالأرض بحس كأن حد حضني وانا عمالة ابكي فحضنه.. فكنت ببكي كتيييييييير لحد ما ارتاح ودة لأنه هو الوحيد الي عارف حصلي ايه، بدون ما احكيله .. وبدون ما اتكسف منه، ومكنتش بتكلم ولا بقول حاجة.. كنت بوجه لربنا رسائل بإحساسي فقط اني مكسوفة منك اوي ومش عارفة اقولك ايه ولا اقولك انا عيزة ايه وانت مغرقني فنعمك.. كنت خايفة ادعيه واقوله يا رب زيح عني الابتلاء دة فياخد مني نعم تانية انا مأدرش استغنى عنها .. كنت دايما بلائي ان الابتلاء دة هو اخف حاجة انا ممكن استحملها.. ودايما كنت بحس اني فخير عظيم وانه رايدلي خير من الي بيجرالي دة، عشان كدة كان عندي نوع من القناعة بس ميمنعش بردو ان الشيطان شاطر
كنت بقول الله المستعان وافضل اعيط..
بس كان عندي قناعتين مؤمنة بيهم.. ان كل الي عدى علية دة ومازال بيعدي خييييير كبير وانا مؤمنة بكدة
وربنا بيقول وبشر الصابرين، ودايما كنت اتذكر عبارة (القابضون على الجمر) واقول فعلاً المقولة دي صحيحة 100% لأن الجنة مش ببلاش
والقناعة التانية اني لو نسيت كل الي فات هرتاح وهفضل قريبة من ربنا (واعتقد دة كان من الشيطان)
وعالأساس دة كنت بتمنى دايماً افقد الذاكرة
.
.
.
.
.
.
.
.
ونسيت ان دعائي دة منتهى الأنانية مني
عارفين يعني ايه انسى عشر سنين فاتوا من حياتي ؟؟
بكل الي فيهم؟؟
بحلوهم ومرهم؟؟
اكيد متعرفوش لأنكم مجربتوش الإحساس دة
انا بأة هقولكم الي حصلي
انا معايا آي فون، وكل فترة بعمله أب ديت UP DATE
وكنت كل ما اعمله باخد نسخة من كل الصور والميديا الي عندي واحطها عالبي سي
كنت بخاف تتمسح ودي نسختي الوحيدة
وبعد ما اعمل الأب ديت ملأيش حاجة اتمسحت
امبارح وانا فعز حزني وبتمنى من ربنا افقد الذاكرة بجد وانسى أسوأ فترة فحياتي الي فاتت وابدأ من جديد
لئيت الآي فون نزل أب ديت جديد
فعملته بدون ما اخد نسخ من الميديا، سبحان الله ساعة القدر بيعمى البصر.. تفتكرو ليه في اللحظة دي بالذات والمرة دي بالذات مأخدتش نسخة ؟؟
وقد كان
واتفاجئ بعد الأب ديت إن كل الميديا الي عالآي فون اتمسحت
عارفين ايه الي اتمسح ؟؟؟
ذكريات لا يمكن تتعوض
لحظات ولادتي لأطفالي .. ولادي اول ما اتولدو.. سبوعهم.. اعياد ميلادهم.. اول مرة يقولو بابا وماما.. اول مرة يمشو.. اول مرة يبتسمو.. الفسحة الفولانية فالمكان الفولاني.. اعياد ميلادي وتجمعي مع اهلي واخواتي ووالدي ووالدتي الي هم بعيد عني دلوقت وانا فغربة.. لحظاتي الجميلة مع زوجي وولادي
كل مقولة او حكمة عجبتني واتعلمت منها حاجات مهمة وحفظتها عندي عالآي فون
كل حاجة حلوة فحياتي وثقتها عندي سواء بفيديو او صورة اتمسحت خلاص ومبآش ليها وجود
مش محفوظة غير في ذاكرتي انا بس.. فدماغي انا بس
شفتو رد ربنا علية ؟؟ شفتو الرسالة الي ربنا وصلهالي..
انتو مش متخيلين الغصة الي حساها فألبي بسبب ان الحاجات الحلوة دي كلها اتمسحت.. مش ادرة اقولكم شعوري وانا حسة كمان اني انا السبب فكدة وانا المسؤولة عن التصرف دة
ربنا عايز يقولي ويقول لأي إنسان بيتمنى يفقد الذاكرة عشان ينسى حياته الي فاتت
ان حياتك فيها الحلو والمُر.. فيها الأسود والأبيض.. فيها السعادة والحزن.. أياً كان الي حصلك.. إتجرحتي.. اتغدر بيكي.. ذقتي الذل والهوان والقسوة من اقرب الناس ليكي.. اي حاجة حصلتلك.. اكيد اتعلمتي منها حاجة.. وكانت خير ليكي.. وأياً كان الابتلاء الي عشتيه فأكيد قوى معدنك، افضل من ابتلاءات كتير مر بيها غيرك.. إنتي افضل من غيرك كتير.. إحمدي ربنا
دايماً قارني بين الابتلاء الي انتي مريتي بيه دة واي ابتلاء تاني كان ممكن يحصلك وربنا رفعه عنك عشان خير عملتيه فحياتك او دعاء دعيتيه..
مثلاً.. أنهي الأفضل ؟ ان حد يغدر بيكي ويخونك.. ولا ان ربنا ياخد منك نعمة الصحة وتبئي قعيدة ومحتاجة الي يخدمك ؟ أو ربنا يبتليكي بمرض ياكل فجسمك وتحسي بآلام لا يمكن تتحمليها ؟
أنهي الأفضل ؟؟ إنك تحزني شوية وتتظلمي؟؟ ولا ان ربنا ياخد منك نعمة الستر ويكشف سترك ادام الناس كلها وتلائي فيديو او صورة مش كويسة منتشرة ليكي عالنت والناس كلها تشوفها ؟
دايماً لو قارنتي نفسك بغيرك وابتلائك ومصيبتك بابتلاءات ومصائب ناس تانية.. هتلائي نفسك احسن منهم كتييييييييييييييير
قالَ ابنُ القيّم رَحِمه الله...
لو كَشف الله الغطَاء لِعَبده
و أظهرَ لهُ كيف يُدبّر لهُ أمورَه
و كيفَ أنّ الله أكثرَ حِرصاً على مَصلَحةِ العَبدِ من نَفسه
و أنه أرحَم به من أمّه
لَذابَ قَلبُ العبدِ مَحبة للّـه
و لتَقطّع قلبُه شُكرا لله
فاللّهم لكَ الحمدُ والشُكر
ربنا نبهني لحاجة مهمة جداً انا مكنتش واخدة بالي منها
انتي عيزة تفقدي الذاكرة.. بس خدي بالك ان الذاكرة الي انتي عيزة تفقديها دي فيها لحظات حلوة كتير لا يمكن تتعوض.. فيها لحظات حلوة كتيييييييير مش هتتكرر تاني..
ربنا كأنه بيعلمني ويوجهني أبل ما ادعيه.. يا حبيبي يارب
ربنا خلاني احس بقيمة الحاجات دي لما اتمسحت كلها من ذاكرة تلفوني، ودلوقت بأت الحاجات الحلوة دي ملهاش غير مكان واحد بس.. فدماغي.. فذاكرتي انا
ربنا عايز يقولي انك لو كنتي فقدتي الذاكرة.. ونسيتي.. كنتي هترجعي لتلفونك عشان تفتكري اللحظات الجميلة دي
دلوقت مبآش في حاجة ممكن ارجعلها خلاص..
تفتكرو بعد الرسالة الواضحة والصريحة دي، انا هتمنى تاني الأمنية دي ؟ انتو هتتمنو فلحظة يأس انكم تنسو وانكم تفقدو الذاكرة
ليست هناك تعليقات:
إرسال تعليق